வெளிநாட்டில் பொருள் தேடி வந்ததினால் நாம் இழந்தது எத்தனையோ... தேடிவந்த பொருள் கிடைத்தது ஆனால் தொலைத்து வந்த சந்தோசங்கள்..?
துபாய் தமிழ்த்தேர் இதழுக்காக கொடுக்கப்பட்ட "எதைத்தேடுகிறோம்" என்ற தலைப்பிற்கு நான் எழுதிய தேடல்கள்...
- பந்தங்கள் சூழ
வழியனுப்பப்பட்டு
பறந்து வரும் முன்
சொந்தங்கள் முன்
தொலைத்த –அந்த
சந்தோஷத்தை…..
- கட்டிளம் காளையாக
பாலைபுகுந்து இன்று
கசக்கிப்பிழியப்பட்ட
அடிமாடுகளாய்
இழந்து நிற்கும்
இளமையை…
- KFC,சவர்மாவின்
ருசியில் சிக்கி
சவமாகிப்போன நாக்கில்
அன்று ருசித்த
அம்மாவின் சமையல்
ருசியை…
- வழியனுப்ப வாசல்
வந்தவளின்
விழி உகுத்த
சிறு துளியில் -மனம்
வலிக்க மறுநொடியே
மறந்து வந்த
இதயத்தை…
- விடுமுறையில்
வீடு செல்ல
வழிப்போக்கன் போல்
பார்த்த பிள்ளை
புறப்படும் முன்
புன்முறுக “அப்பா” என்க
புல்லரித்து
அள்ளி அனைத்து
கொஞ்சிய
அந்த நொடி
பிஞ்சு ஸ்பரிசத்தை….
- திருவிழாக்கள்,
பெருநாட்கள் –
உற்றார் புடைசூழக்
கொண்டாட
உளவியலாய் களையிழந்து
மனமிங்கு தனிமையில்
திண்டாட
அலை, அலையாய்
தொலைத்து நிற்கும்-அந்த
இனிய தருணங்களை….
பொருள் தேட என்றெண்ணி
புறப்பட்டு வந்தோம்-இங்கு
இருள் சூழ அருளிழந்து-மனம்
புளுகி நின்றோம்
தேடிவந்த பொருள் கிடைத்தும்-நாட்டில்
தொலைத்து வந்த
சந்தோசத்தை
விட்ட இடம் விட்டு
மற்ற இடத்தில்
தேடுகிறோம் தேடுகிறோம்…
